روايه تصرفات جوزي بقت غريبه كامله حتي الفصل الأخير

تصرفات أحمد جوزي في الفترة الأخيرة بقت غريبه..
بقا يقفل تليفونه في الليل بالساعات
وأحيانا يبات بره
ولما يرجع بيبقى باين عليه الأرهاق والتعب
وهدومه بيبقى فيها ريحة غريبة كإنها ريحة بخور
أسأله كنت فين
يقولي كنت في شغل
شغل إيه!
يقولي شغل مقاولات داخل فيه ومفيش كهربا هناك وهبقى أحكيلك كل حاجه ويقوم قاطم الكلام على كدة

الغريب اللي خلاني اشك فيه أكتر إني ماعرفلوش شغل من وقت ما انفصل عن شريكه من اكتر من شهر
كانوا فاتحين سوى محل بقاله
ولما انفصلوا سألته سيبت المحل ليه قال لي إن في مصلحة تانيه هيدخل فيها بالفلوس اللي هتطلعله من فض الشركة مع سيد ابن خالته
مصلحة إيه
قال لي هتعرفي كل حاجه في وقتها
وعلى دا الحال من يوم ما انفصل
لغاية ما في ليله اتصل بعد ما فتح تليفونه وقال لي إنه هيبات بره
فكنت متنرفزه جدا من موضوع غيابه في الليل ده وزود الطينه بله لما قال لي إنه هيبات بره للمره التالته ولا الرابعة
فقال لي عشان يهديني
_خلاص هانت وهحكيلك كل حاجه لكن انتي ادعيلي بس إن بكره يعدي على خير
فقفلت وانا كالعادة خاېفه من كوني هبات لوحدي في الشقة
لكن قمت اتوضيت وقريت الورد بتاعي من القرآن ودعيتله ونمت..
عشان أول ما أغمض عينيا أشوف نفسي
مسافره في عربية ميكروباص في الليل لوحدي
ورايحة أجيب شنطة من عند واحدة كان أحمد عاينها عندها بقاله فترة كبيرة..
وبعد ما قطعت مشوار طويل وقفت العربيه على أول طريق زراعي على يمينه أراضي زراعيه وعلى شماله ترعه...
وساعتها السواق اتدور وبص لي
لاني كنت قاعده في الكرسي اللي وراه
فلقيت وشه زي ما يكون مرايه مدورة وعاكسه صورة وشي جواها
فدققت أوي في ملامحي
كانت كل حاجه هي هي
لكن كانت الصورة بتتهز
لغاية ما قطع ذهولي إن لقيت صورتي في المرايه بتقول
_دا الطريق اللي المفروض ما يتمشاش
وقتها حسيت ببروده في ضلوعي وأعلى ضهري وبنبضات قلبي بتزيد
لكن سألت
انتي مين
_انا اللي زي ضلك
بعدها كإن جزء من الأحداث اتقطع
ولقيت نفسي في أول الطريق الزراعي والعربيه اختفت
ففضلت اتلفت حواليا وادور عليها
لكن ماكنش ليها أي أثر
وقتها مشيت وانا قلبي بيترعش من الخۏف ونفسي حاسه إني مش لاقطاه وبتلفت كل شويه حواليا
عشان بعد شوية مشي ألاحظ إنه طريق طويل أوي وكإن مالوش آخر والترعه اللي على شماله دي صورتي ظاهره فيها على ضي القمر
وكل ما أبص ناحيتها أحس إنها كمان بتبص ناحيتي مش مجرد صورة في المية.
لكن اللي خلى جسمي كله يقشعر إن أثناء ما كنت ببص على الترعه سمعت صوت فحيح
كإن ألف تعبان بيصوتوا
فبصيت ناحية الأرض اللي على يمين الترعه لقيتها مزروعة بأفاعي كوبرا ديولها مغروسه في الأرض واجسامها بتتمايل لفوق
فبدأت أجري وكإني مش حاسه بجسمي ولا برجليا..
لغاية ما وصلت مشارف بلد كان على أولها جامع تحت التشييد على ايدي اليمين وبعد الجامع كان في بيت
كان البيت المقصود
فدخلت لقيت صالة أرضيتها أسمنت وفي وسط الصالة زير قديم ومتعلق على الحيطة مرايه بيضاويه وحواليها إطار برونزي
كان منظر المراية مش متناسب مع المكان خالص..
لكن مافيش ثواني ولقيت ست كبيرة داخله عليا من أوضة من الأوض ومعاها أربع بنات
كان تلاته منهم طبيعيين والرابعه كانت بتتحرك بصعوبه وهي مميله راسها لتحت وبتهزها هزات مش منتظمه
فسألت الست دي
_فين الشنطة 
دوري في الأرض براحتك انا ماعرفش فين مكانها
_فبدأت أخبط في الأرض برجلي فيطلع من تحت الأرض تراب
وكل ما أخطي خطوة في الصالة أخبط في الأرض برجلي فيطلع تراب
لغاية ما لمحت صورتي في المراية
فلقيت صورتي بتبتسم وتقول
_ومش دي