روايه كوز العسل مكتمله جميع الفصول

الحلقة ١
اتجوزت من حوالي ٢٤ سنة عيشت فيهم حياة هادية مع اول انسانة حبتها في حياتي .
انا اصلا معرفتش الحب الا معاها لأني اتجوزتها وانا صغير كان عمري وقتها ٢١ سنة وابويا وامي كانوا مستعجلين علي جوازي .
ربنا رزقنا بابني الكبير حمدي وبعده ٣ بنات عبير وزهرة و مني .
زي ما ابويا جوزني صغير كنت عاوز اجوز عيالي صغيرين ربنا كرمني وجوزت ال٣ بنات ومش باقي معايا غير حمدي .
كنت عاوز افرح به واجوزه زي اخواته لكنه كان دايما بيهرب من الكلام اول ما افتح سيرة الجواز !!!
لغاية ما في يوم قولتله عاوز افرح بيك يا حمدي قبل ما اموت .

مۏت اي يابا بعد الشړ عنك انت لسه صغير . 
هو المۏت يابني بيفرق بين صغير وكبير .
انا عارف يابا لكن اقصد انك لسه مكملتش ٤٥ سنة ولسه العمر قدامك .
ربنا وحده اللي يعلم اذا كان عمري قدامي ولا ورايا لكن عموما مش ده موضوعنا انا عاوز افرح بيك قريب وخلاص .
طيب انا هريحك يا بابا واول ما ألقي بنت الحلال هقولك تخطبهالي .
وعدا علي كلامنا ده شهر واتنين وتلاته وحمدي ساكت عن موضوع الجواز !!! لحد ما شوفت بنت زي القمر وعمرها قريب من عمره .
سألت عنها وعرفت انها اسمها هدير و مش مخطوبة ومن قرية جنبنا وكانت جاية القرية تزور خالتها اللي متجوزة في قريتنا .
جريت علي الواد حمدي وقولتله خد ياض يا حمدي لك عندي عروسة احلي من كوز العسل .
مين دي يابا  
مش من بلدنا من بلد جنبنا جاية تزور خالتها هنا .
يابا طيب نأجل موضوع الجواز شوية دلوقتي .
بقولك احلي من كوز العسل تقولي نأجل دلوقتي !!! ياض انت فيك اي انت مش رجل ولا اي  
عيب يابا اللي بتقوله ده ابنك رجل . بقلم عادل عبد الله 
اومال كده مالك خاېف من الجواز ليه 
خلاص يابا اشوفها الاول ولو عجبتني أتوكل علي الله واتجوزها .
اخدت حمدي وروحنا نزور أهل العروسة وعلشان حمدي مش يرجع في كلامه طلبت ايدها مباشرة و قولت لأبوها 
احنا جايين نخطب ايد بنتك هدير لابني حمدي انا اسمي ربيع وده ابني حمدي وده عنوانا أسأل علينا زي ما تحب وخد رأي العروسة ورد علينا .
ابو العروسة من غير ما أسأل عليكم انتو سيرتكم سبقاكم بالخير وانا اعرفك واسمع عنك من سنين طويلة واكيد ابنك ابن ناس ومحترم زي ابوه وان شاء الله يومين بس أشاور العروسة واتصل عليكم .
مشينا من عند العروسة وحمدي هينفجر من الغيظ !!! 
مالك يا حمدي 
يابا انت اتسرعت ليه وطلبت ايدها مش قولتلك لما اشوفها الاول ولو عجبتني نخطبها 
ما انت شوفتها يا بني !! 
ايوه شوفتها يابا .
وهي مش عجبتك ولا اي !!
لأ يابا مش عجبتني .
دي متعجبكش ازاي !! دي البت زي كوز العسل !!
معجبتنيش يابا . لو عجباك اتجوزها انت .
انت بتستهبل ياحمدي !!!
طيب اعمل اي يابا بص يابا من الاخر العروسة مش عجباني ومش هتجوزها .
طيب لو ابوها اتصل عليا وقالي انهم وافقوا اعمل اي ساعتها 
معرفش يابا بقي محدش قالك تتسرع و تطلبها علطول كده .
اومال احنا كنا رايحين عندهم ليه يا بني !!
كلامك معايا اننا رايحين نشوف العروسة وبعدين اقولك اذا كانت عجبتني وهخطبها ولا لأ .
ده اخر كلام عندك 
ايوه يابا مش هتجوز العروسة دي .
طيب يا حمدي ربنا يسترها بقي مش عارف هتصرف ازاي لو ابوها قالي انهم موافقين .
وبعد يومين حصل اللي كنت خاېف منه !!!
ابو هدير اتصل عليا وقالي الف مبروك يا ابو حمدي العروسة وافقت وتقدروا تشرفونا في اي وقت .
رديت عليه بارتباك يا ألف بركة يا ابو هدير ان شاء الله هكلمك بكره هقولك هنيجي نزوركم امتي .
تشرفونا في اي وفت .
ناديت علي حمدي وقولتله ابوها اتصل يا حمدي ووافقوا هنتصرف ازاي دلوقتي  
معرفش يابا .
انت لو مش خطبت البنت دي هتخلي رقبتي زي السمسمة !! انت تخطبها دلوقتي يا حمدي وتشوف بعد كده لو مش ارتحت لها ابقي فك الخطوبة ويمكن ترتاحلها و تحبها وتكمل معها .
لأ يابا انت عاوز تدبسني في الجوازة دي وخلاص .
ادبسك اي يابني انت !!! هو انت تعرف تتجوز واحدة حلوة زي دي !!
يابا انا قولتلك مادام عجباك بالشكل ده اتجوزها انت واهو تبقي خرجت من الاحراج مع ابو العروسة .
بقي كده يا حمدي !!! 
معلش يابا .
طيب يا حمدي . 
واتصلت علي ابو العروسة وقولتله اني أروح ازوره تاني يوم .
وبالفعل روحت تاني يوم لابو العروسة وكنت لوحدي !!!
قعدت مع ابو هدير اللي رحب بيا اوي وبعد دقايق دخلت العروسة ومعها المشروبات وكانت عينيها بتدور علي حمدي !!!
عاوز اتكلم مع ابو هدير ومش عارف ابتدي منين الكلام !!! 
اومال فين العريس 
ضحكت وقولتله وانا مش مالي عينك ولا اي يا ابو العروسة 
قد الدنيا يا ابو حمدي . لكن انا اقصد ابنك مجاش معاك ليه 
لأ اصل حصل سوء تفاهم .
سوء تفاهم ازاي يا ابو حمدي 
انا كنت بطلب ايد العروسة لنفسي مش لابني !!!
عدت ثواني من الصمت وبعدها ابتسم ابو هدير وقالي وماله انت سيد الرجالة لكن انا والعروسة فهمنا غلط .
حصل خير وعموما انت موجود والعروسة موجودة ممكن تاخد رأيها واحنا قاعدين اهو ولو العروسة وافقت ننزل النهاردة نشتري الشبكة اللي تختارها العروسة وتليق بها والغالي كله هجيبهولها تحت رجليها .
استأذنك بس عشر دقايق وارجعلك .
خرج ابو هدير وبعد حوالي ربع ساعة رجع وقالي العروسة وافقت الف مبروك علينا وعليك .
الحلقة ٢
خرج ابو هدير وبعد حوالي ربع ساعة رجع وقالي العروسة وافقت الف مبروك علينا وعليك .
ونزلت مع هدير وابوها وامها واخواتها واشترينا شبكة محترمة .
وكان واضح علي هدير انها فرحانة جدا وخصوصا لما اشترينا شبكة كبيرة غالية وحسيت ان موضوع فرق السن مش مسبب لها اي مشكلة .
رجعت البيت واول لما شوفت حمدي قولتله اعمل حسابك هتيجي معايا بكره مشوار 
هنروح فين يابا 
هتعرف بكره .
خطوبة وجواز بردو 
لأ يا فالح مشوار تاني علشان عاوز اتأكد من حاجة .
وتاني يوم روحنا للدكتور وقولت للدكتور عاوزك تكشف علي الولد ده وتقولي اذا كان معيوب ولا رجل طبيعي 
حمدي كان رافض الكشف لكن بعد الضغط عليه الدكتور كشف وقالي ابنك زي الفل يا عم ربيع .
يعني يا دكتور ابني له في الجواز والخلفة 
ايوه متخافش عليه ابنك زي الفل وممكن يتجوز ٤ ستات كمان .
اومال ليه رافض الجواز وبيهرب منه

هو بالنسبة للجواز مفيش مشاكل بس تلاقيه عايز يعيش شبابه وخاېف من المسئولية .
رد حمدي ايوه قوله يا دكتور ابويا عاوز يكتفني بالجواز والعيال من دلوقتي !!
يابني انا عاوز مصلحتك وعايز افرح ببك  
متشكرين يا دكتور .
وخرجت مع حمدي وهو زعلان وبيقولي اطمنت يابا 
متزعلش يا حمدي بس بصراحة انا قلقت عليك لما لقيتك بتهرب من الجواز وكنت عاوز اطمن عليك .
يابا انا مش بهرب علشان عاجز و لا معيوب انا بس عايز اعيش يومين قبل ما اتكتف بالجواز والعيال .
طيب يا حبيبي بس ياريت تخلي فكرة الجواز في دماغك .
المهم يابا انت عملت اي مع ابو العروسة اللي اسمها هدير 
خلاص بقي مادام انت رفضت الموضوع انا هتصرف .
يعني هتعمل ايه 
سيبها لله .
رجعنا البيت وام حمدي سألتني كنتوا فين يا ربيع 
كنا في مشوار كده . المهم دلوقتي جهزيلي الاكل علشان جعان اوي .
حمدي خرج وقعدت انا مع امه نتغدا وسألتها بقولك يا ام حمدي .
قول يا ابو حمدي .
مالك !! طول عمرك بتنادي ربيع ومش بتنادي ابو حمدي الا لما تكوني زعلانة !!!
وانت طول عمرك لما بنكون لوحدنا بتناديني نعومة اونعناعة ومش بتقولي يا ام حمدي الا لما يكون معانا حد .
خلاص يا حببيبتي نسيت متزعليش يا نعومة .
ضحكت ام حمدي وقالت قول يا ربيع كنت عاوز تقول ايه 
كنت عاوز اشتكيلك من حمدي ابنك ورفضه للجواز .
وهو ده جديد عليه !!! من كام سنة واحنا بنقوله اتجوز وهو رافض .
بيني وبينك انا قلقت علي الواد وروحت كشفت عليه .
ها والدكتور قال ايه 
قال ان ابنك زي الفل ويقدر يتجوز ٤ لو عايز .
خلاص يا ربيع يبقي زعلان ليه بقي يتجوز وقت ما يحب وهنستعجل ليه 
المشكلة يا نعمة انه احرجني مع الناس .
ناس مين اللي احرجك معاهم  
البنت اللي شوفتها وروحنا اخطبهاله .
مالها  
ابوها رد عليا و بلغني انهم موافقين .
يادي الكسوف !!! وبعدين هتعمل اي  
بأي حال من الأحوال مش هينفع منروحش للناس ولا نتهرب منهم فكنت لازم اتصرف علشان مش نطلع صغيرين قدام الناس .
وهنعمل ايه يا ربيع !!! لو كان معنا ولد تاني كنا خطبنهاله انما حمدي هو الولد الحيلة مفيش غيره .
الحمد لله المهم ربنا يبارك لنا فيه .
قولي هتعمل ايه مع الناس دي دلوقتي  
لأ خلاص ما انا اتصرفت يا نعومه .
ايوه عملت اي يعني  
خطبتها ليا انا .
وقامت ام حمدي صړخت بأعلي صوتها ......
وطي صوتك يا وليه .
ولولو عليك بدري هتتجوز عليا يا ربيع !!!!
يا وليه اهدي وانا افهمك .
تفهمني اي ېخرب بيتك !!! 
انا مش هتجوز حبا في الحريم .
اومال هتتجوز ليه 
لسببين اولهم علشان منطلعش صغيرين قدام الناس .
تقوم تتجوزها انت يا سيد الرجالة !!!!!
طيب اسمعي السبب التاني .
قول .
السبب التاني اني عاوز ولد تاني يبقي اخ لحمدي .
دلوقتي يا ربيع دا انت مقولتش كده وانت لسه صغير !!!
ما انا دلوقتي حسيت اني محتاج ولد تاني يشيل اسمي وانتي خلاص مش هينفع تخلفي تاني .
اه علشان انا كبرت ومش هخلف تاني تقوم ترميني وتتجوز بنت صغيرة !!
ارميكي اي يا وليه !!! دا انتي مراتي وحبيبتي و ستي كمان مقدرش افرط فيكي ابدا انتي هتفضلي مراتي وست البيت .
عاوز تفهمني ان اللي هتتجوزها هتجيبها تخدمني !!!!
مش بالظبط علشان يبقي حرام علينا انما انتي هيبقي ليكي الكلمة الاولي والاخيرة في البيت .
مكنش العشم يا ربيع !!! هتتجوز عليا بعد العمر ده كله !!!
الحلقة ٣
ارميكي اي يا وليه !!! دا انتي مراتي وحبيبتي و ستي كمان مقدرش افرط فيكي ابدا انتي هتفضلي مراتي وست البيت .
عاوز تفهمني ان اللي هتتجوزها هتجيبها تخدمني !!!!
مش بالظبط علشان يبقي حرام علينا انما انتي هيبقي ليكي الكلمة الاولي والاخيرة في البيت .
مكنش العشم يا ربيع !!! هتتجوز عليا بعد العمر ده كله !!!
ما انا فهمتك السبب يا نعومه .
انا مش موافقة يا ربيع واذا كان عن الناس يبقي الواد حمدي يخطب البنت دي ورجله فوق رقبته !!!
مش هينفع خلاص لأن انا كلمت ابوها وقولتله .
قولتله اي انك هتخطبها لنفسك 
ايوه . وخلاص وافقوا .
جلست ام حمدي تبكي فحاولت تهدأتها ولكنها زادت عصبيتها وقالت ومادام انت كلمتهم واتفقتم جاي تقولي ليه  
علشان انتي غالية عندي ومش اقدر اعمل حاجة من غير ما اقولك .
وبعد محاولات ومحايلات كتير اوي ونقاش طويل جدا قدرت اقنعها انها توافق وتتقبل الوضع .
حمدي لما عرف اني خطبت هدير أظهر قدامي موافقته لكنه لما عرف بزعل امه اخد موقف لكن لم يعترض اما بناتي زعلوا جدا علي زعل امهم !!!
وبعد اقل من شهرين كان معاد الفرح اللي هدير صممت انها يتعملها فرح كبير في قاعة كبيرة ومعازيم من العائلتين !!!
حضر الفرح كل اهل واصحاب العروسة وحضر اخواتي و بعض من قرايبي ما عدا نعمة مراتي و عيالنا .
انا كنت متوقع عدم حضورهم و علشان كده مش اتفاجئت ابدا لكني اتفاجئت بحمدي وصل الفرح في نص الوقت تقريبا !!! 
ورغم اني كنت مبسوط جدا بالفرح وبالعروسة الجميلة اللي هيتقفل علينا باب الليلة لكني لاحظت نظرات بعض الحاضرين اللي حسيت ان معناها شوفوا الرجل اللي اخد عروسة ابنه لنفسه .
الاحساس اللي وصلني ده من نظراتهم ضايقني فحاولت انهي الفرح بسرعة !!! 
خلص الفرح و اخدت العروسة وسافرنا نقضي شهر العسل .
مش شهر بالظبط لكني كنت حاجز اسبوعين في فندق في شرم الشيخ .
سافرنا نقضي شهر العسل وطول المسافة وانا وهدير بنتكلم ونضحك ونهزر وكنت حاسس ان شبابها وروحها الخفيفة صغرتني عن سني مش اقل من ١٠ او ١٥ سنة ورجعتني لبدايات شبابي من جديد !!!
وصلنا الفندق ودخلنا غرفتنا وزي ما كنت متوقع ظهرت حمرة الخجل علي العروسة بعد ما بقينا وحدنا !!!
احساس خجل البنات اللي غاب عني سنين طويلة ورجعت بذكرياتي ليوم فرحي علي ام حمدي .
لكن العروسة غير العروسة دي حاجة مختلفة تماما دي كوز عسل في صورة بنت جميلة سبحان من صورها .
وبعد دقايق كانت العروسة بين احضاني ووقتها حسيت بأحساس مختلف تماما .
فرق كبير جدا بين هدير ونعمة !!! 
صحيح ان نعمة اول حب في حياتي ولسه بحبها لغاية دلوقتي لكن هدير حسيت معها من اول يوم باحاسيس مختلفة تماما .
كانت اجمل ليلة في حياتي حسيت بعدها اني كنت مش عايش ولا اتجوزت قبل كده وكأني اول مرة اتجوز !!!
هدير كمان حسيت انها مبسوطة معايا جدا وسعيدة